Lampahan Saradan (Sumantri gugur/Dasamuka Seret)

 (raden sumantri,ingkang dados patihipun prabu arjunasasra ing maespati nama patih suwanda)


Pathet nem :

1. Jejer negara maespati : prabu arjunasasra kahadep patih suwanda lan patih surata. Rembag : sang nata badhe tindak mring segara kidul mituruti panyuwunan Dewi citrawati lan Putri dhomas. Sang nata ndawuhaken ki patih kinen yasa pasanggrahan cacah kalih, ingkang para Ratu wonten ing karangliman, Dene ingkang Putri wonten ing parangtritis. Wusnya purna kondur ngedhaton.

 2. Paseban njawi maespati : patih suwanda lan Patih surata kahadep prabu sasratmaja, prabu suryakethu, prabu candrakethu, prabu kalinggaprana, prabu kalinggamurti lan prabu kalinggapati. Rembag : kadhawuhan sang nata budhal mring segara kidul lan pasang pesanggrahan cacah kalih. Budhalan.

 3. Ing tengah margi : resi ramabargawa ingkang tapa mlaku, kepapag batara narada : bab sampurna patinipun resi ramabargawa, ingkang saged namung nyampurnakaken patine resi ramabargawa namung prabu arjunasasra ing maespati. Resi ramabargawa sagah nulya bidhal.

4. Perang gagal : resi ramabargawa kepapag wadya maespati, sumbar nyuwun mati dhateng Ratu maespati. Wadya maespati muring lajeng perang kaliyan resi ramabargawa, nanging wadya maespati kawon, prabu arjunasasra methukaken resi ramabargawa. Sang resi nyuwun pejah nanging prabu arjunasasra Tan purun, resi ramabargawa muring gya nglabrak prabu arjunasasra, dadi perang rame nanging resi ramabargawa kasoran. Lajeng resi ramabargawa mentang kyai bargawastra, kenging prabu arjunasasra,sang nata kantaka. Resi ramabargawa gela gya oncat saking pabaratan, geger para Ratu. Patih suwanda ndawuhaken kinen nglajengaken tindakira mring segara kidul. Prabu arjunasasra kagotong para Raja.

5. Candhakan magakan : resi ramabargawa manggihi batara naradha. Resi ramabargawa nguman uman menawi dewa punika goroh, batara narada ngandika bilih punika taksih ngutang, ingkang nyaur nembe benjang resi ramabargawa kepanggih putra Ratu ayodya ingkang mboyong putri manthili. Resi ramabargawa gela lajeng kesah tanpa pamit. Sigeg.


Pathet sanga :


 1. Ing segara kidul : patih suwanda kahadep punakawan. Rembag : sungkawa Dene sang nata kantaka kasoring Yuda, gya patih suwanda nganti punakawan nggugah prabu arjunasasra kang nembe kantaka. Budhal.

 2. Perang kembang : ing margi sak kiwa tengene segara kidul wonten raseksa alengka kepapag patih sumantri, dadi perang rame. Wasana wadya raseksa alengka sami pejah.

 3. Ing karangliman : prabu arjunasasra ingkang kantaka, patih sumantri lan punakawan. Gya nggugah arjunasasra kang kantaka, wusnya enget. Prabu arjunasasra triwikrama dados brahala. Lajeng njegur ing segara kidul, maweh prabawa toyaning segara dados asat, kaya katambak brahala, toya mbleber kutah dumugi dharatan, tumekaning negara alengka. Ditya kala janggisrana mangertosi lelampahan punika gya lumajar wadul mring sang nata.

 Pathet manyura :


 1. Ing negara ngalengka : prabu dasamuka kahadep patih prahastha. Rembag : sang nata cuwa awit Dewi citrawati sampun kaboyong dhateng maespati, kesaru rawuhipun ditya kala janggisrana. Wadul menawi toyaning samodra mbleber dumugi dharatan alengka temah dadi banjir awit pakartinipun prabu arjunasasra dados brahala tapa ngambang wonten segara kidul. Lan angepasi Dewi citrawati lan Putri dhomas sami mapan wonten pesanggrahan parangtritis. Prabu dasamuka gya budhal golek dakdakane pasulayan mring segara kidul.

 2. Ing karangliman : prabu sasratmaja, prabu suryakethu, prabu candrakethu, kahadep prabu kalinggaprana, prabu kalinggamurti, lan prabu kalinggapati. Rembag : sami ngreksa kayuwananing prabu arjunasasra ingkang tapa ngambang wonten segara kidul. Kedadak prabu dasamuka prapta nggetak sedaya para Ratu, dadi perang rame, para Ratu sami pejah kenging siyungipun prabu dasamuka, candhakan : patih suwanda maju, nanging kasoran, musthi senjata cakra kenging prabu dasamuka, nata alengka pejah nanging saged gesang malih. Patih suwanda lajeng nyengklak kudha kyai Pamuk mengsah prabu dasamuka. Nata alengka kaslentak jaran wola wali ngantos prabu dasamuka kasoran lumajar dhateng wana. Candhakan : rikala dumugi wana, prabu dasamuka katelasan napas, mangertos wonten sumur, prabu dasamuka gya ngunjuk toya sumur nganti asat, angepasi kumaraning sukasrana rayinipun patih suwanda arsa mapag patinipun ingkang raka, sukasrana manjing siyunge prabu dasamuka, gya prabu dasamuka maju malih ing pabaratan. Candhakan : prabu dasamuka kepapag patih sumantri ingkang nitih kudha kyai Pamuk, dadi perang rame, kudha kyai pamuk kapidak dadi patine, patih suwanda kacandak gya kacokot dadi patine. Para punakawan lumajar.

3. Ing segara kidul : prabu arjunasasra ingkang wujud brahala tasik tapa nendra ing segara kidul kagugah para punakawan, ngandika bilih patih suwanda lan para Raja sami pejah dipun sirnakaken prabu dasamuka, lan Dewi citrawati kabekta mlajar. Prabu arjunasasra muring sanget, wungu saking tapa nendra gya mlumpat. Candhakan : prabu dasamuka ingkang sampun nyangking Dewi citrawati, guyu lakak lakak, nanging dereng dangu prabu arjunasasra ingkang wujud brahala nyandak prabu dasamuka, Dene Dewi Citrawati kalebetaken kancing gelung, nyiksa prabu dasamuka ngantos prabu arjunasasra jeleh. Candhakan : prabu dasamuka mlajar, prabu arjunasasra ingkang wujud brahala salin rupa, gya njemparing mawi panah rante, kenging prabu dasamuka, nata maespati ndawuhaken punakawan nyepakaken kreta kyai bandang angin kangge nyeret prabu dasamuka. Candhakan : prabu arjunasasra nyepeng kreta kyai bandang angin lajeng nyeret prabu dasamuka (kawastanan lakon dasamuka digledeg),prabu dasamuka kapok diseret sarwi melas nyuwun gesang. Candhakan : praptanipun sukmanipun resi sumali eyangipun prabu dasamuka, mrepegi prabu arjunasasra, nyuwunaken pangapunten dhateng ingkang wayah lan sagah nggesangaken sedaya ingkang sami dipun pejahi prabu dasamuka kejaba patih suwanda, awit sampun ginaris pesthi menawi patih suwanda sampun wancinipun pejah. Gya prabu sumali nggesangaken sedaya para Ratu mawi Tirta amerta, kejaba patih suwanda. Wusana prabu sumali pamit wangsul kaswargan Dene prabu dasamuka oncat saking pabaratan.

4. Jejer pungkasan : prabu arjunasasra kahadep patih surata, prabu sasratmaja, prabu suryakethu, prabu candrakethu, prabu kalinggaprana, prabu kalinggamurti, prabu kalinggapati lan punakawan. Rembag : sadaya sami bela sungkawa awit pejahipun patih suwanda, nanging punika sampun ginaris pesthi menawi sampun tumekaning wanci. Tancep kayon.