Lampahan Prabu Pandu Pragola Manik (gareng dadi ratu)

 (prabu pandu pragola manik,gareng dados ratu)


Pathet nem :

1. Jejer dwarawati : prabu kresna kahadep ingkang raka ing mandura prabu baladewa, raden samba miwah raden setyaki. Rembag : ingkang rayi Dewi wara sembadra ngidam iwak badher bang sisik kencana, awit pamothahing wara sembadra kados mekaten, raden arjuna nitipaken garwanipun ing dwarawati. Dereng dangu kasaru praptanipun Ratu gilingwesi prabu Pandu pragola, gadah sedya nglamar Dewi wara sembadra, mireng sabdanipun Ratu sabrang punika prabu baladewa muring, gya nglarak prabu Pandu pragola medal pasewakan. Prabu kresna ndawuhaken raden samba lan raden setyaki kinen pacak baris ngunduraken wadya gilingwesi. Sadaya sami sandika, pasewakan bubaran.

 2. Paseban njawi : raden samba kahadep raden setyaki, patih udawa, patih pragota lan prabawa. Rembag : tata tata wadya bala ngunduraken parangmuka. Sadaya sandika gya budhalan.

3. Candhakan perang gagal : prabu baladewa nglarak prabu Pandu pragola dadi geger rame, wadya gilingwesi ngamuk nanging kepapag wadya dwarawati. Wadya gilingwesi mundur, nanging prabu Pandu pragola mboten mundur malah mateg aji panglemunan, nyidra dewi sembadra. Sigeg.

4. Adegan magak ing kaputren dwarawati : Dewi wara sembadra tansah sungkawa awit ingkang garwa raden arjuna dereng kepareng kondur, kedadak prabu Pandu pragola saking panglemunan nyidra Dewi sembadra, kabekta mlajar ing gegana. Sigeg.

 Pathet sanga :

1. Ing wana : raden arjuna kadherekaken repat punakawan. Rembag : sungkawa tyasipun awit pamothahipun ingkang garwa wujud iwak badher bang sisik kencana, nanging sang abagus prasetya dereng purun wangsul menawi dereng mituruti panyuwunan ingkang garwa. Budhal. Candhakan : ing margi kepapag pandhita yaksa peparab resi nilayaksa, sedya arsa ngupaya raden arjuna lan badhe kapacangaken kaliyan Dewi nilawati, sulayaning rembag dadi perang nanging raden arjuna kapikut lan kaboyong wangsul mring pertapan arga jati.

2. Ing pertapan argajati : resi nilayaksa ndaupaken Dewi nilawati dhateng raden arjuna, sasampunipum dhaup raden arjuna nyuwun pirsa babagan iwak badher bang sisik kencana, sang resi mboten mangertos nanging paring srana wujud jala ingkang nama jala kyai tampar kencana, piweling sang resi aja pisan pisan medotke jala awit ijolipun nyawa, raden arjuna sandika gya nganti punakawan mring pesisir.

 3. Candhakan : suka tyasipun prabu Pandu pragola dupi kelampahan nyidra wara sembadra, wara sembadra purun kapundhut garwa waton sang nata kersa ngupaya iwak badher bang sisik kencana, prabu Pandu pragola purun nuruti lan lukar busana Ratu, njegur segara. Candhakan : rikala raden arjuna njala iwak nanging datan bisa pinanggih wujudipun iwak badher bang sisik kencana, lajeng gareng njala iwak, kocap ingkang kajala wujudipun sanes iwak nanging prabu Pandu pragola ingkang kenging jala kyai tampar kencana, gya medot jala sakala gareng katut njegur segara, raden arjuna lan punakawan mlajar wangsul mring ngamarta.

Pathet manyura :

1. Candhakan : ing segara gareng katut katempuhing ombak nanging saged pinanggih kaliyan iwak badher bang sisik kencana, gareng ditulungi malah purun kaliyan gareng, lajeng gareng numpak gegeripun iwak badher bang sisik kencana lumampah mring dharatan, candhakan : dumugi daratan malah pinanggih kaliyan wara sembadra, lajeng gareng ngaturaken iwak badher bang sisik kencana dhateng wara sembadra, iwak badher musna manjing raganipun wara sembadra, ing katebihan resi nilayaksa badhar dados batara baruna, ngandika bilih punika dados wahyunipun wara sembadra. Minangka tanda panuwun wara sembadra maringaken busana prabu Pandu pragola dhateng gareng, nalika diagem gareng dadi Ratu. Katungka praptanipun prabu Pandu pragola, muring sanget mangertos wonten pawongan ngagem busananipun. Prabu Pandu pragola perang kaliyan gareng. Nanging prabu Pandu pragola pejah, wusana wara sembadra ndawuhaken gareng madeg nata ing gilingwesi jejuluk prabu Pandu pragola manik, gareng sandika, gareng ndawuhaken wara sembadra kinen manjing mring makutha supados ampun kadenangan sinten kewala. Sigeg

 2. Jejer negara gilingwesi : prabu Pandu pragola manik kahadep punggawa tilasipun prabu Pandu pragola ingkang sami teluk mring sang nata. Rembag : wonten surya kembar ingkang sami wibawanipun kaliyan negara gilingwesi nenggih negara ngamarta, sedya sang nata arsa mbedah praja ngamarta. Budhalan.

3. Negara ngamarta : prabu puntadewa kahadep sowanipun raden werkudara, dereng dangu praptanipun prabu kresna lan prabu baladewa. Rembag : raden arjuna dereng kepareng wangsul malah Dewi wara sembadra murca kacidra duratmaka. Kesaru praptanipun raden arjuna lan punakawan, wadul menawi gareng ugi murca. Praptanipun raden setyaki wadul menawi Ratu gilingwesi ngamuk. Kepapag raden werkudara. Sigeg

4. Candhakan perang brubuh : raden werkudara mapagaken prabu Pandu pragola manik, dados perang nanging raden werkudara kalah. Prabu kresna ndawuhaken petruk lan bagong kinen mapag mengsah. Prabu Pandu pragola manik kepapag petruk pan bagong dadi perang gecul. Wekasan prabu Pandu pragola manik badar dados gareng. Dene makutha coplok medal wara sembadra. Wadya gilingwesi ngira menawi ratunipun pejah lajeng soroh amuk nanging kaunduraken raden werkudara.

5. Jejer pungkasan : prabu puntadewa, prabu kresna, raden werkudara, raden arjuna, Dewi sembadra lan punakawan. Rembag : gareng ngandika bilih nylametaken wara sembadra ingkang kacidra prabu Pandu pragola, sapejahipun prabu Pandu pragola ingkang sesulih jumeneng nata gareng kinarya srana mangsulaken wara sembadra. Sadaya sami suka syukur Dene sampun pinanggih wilujeng. Tancep kayon.