Lampahan Mayangkara (Anoman Muksa)

 

 

Pathet nem :

 

1. Jejer negara kediri : prabu jayabaya kahadep ingkang putra raden jaya amijaya lan patih sugsara. Rembag : sang nata menggalihaken putra estri tetiga sesilih dewi sesanti,dewi pramesthi,lan dewi pramuni. Kathah ingkang sami ngayunaken,candhakan : karawuhan duta saking negari sela uma nama patih kridagsa lan patih hudragsa utusan prabu yaksadewa,arsa nglamar putri tetiga,menawi mboten negari kediri arsa kabedah,raden jaya amijaya muring. Gya nglarak medal ing njawi,sang nata ndawuhaken ki patih kinen pacak baris,patih sugsara sandika. Kondur angedhaton.

 

2. Paseban njawi : patih sugsara kahadep raden wirasena,raden karnaba,raden sambawa lan juragan karma. Rembag : tata tata pacak baris arsa ngunduraken mengsah saking sela uma. Budhalan.

 

3. Perang gagal : wadya kediri tandhing kaliyan patih sela uma kekalih,wadya kediri kasoran. Sang nata prapta lan nyemayani ngentosi 40 dinten rumiyin,duta kekalih wangsul lan sang nata ndawuhaken raden jaya amijaya kinen ngupadi srayan,raden jaya amijaya sandika gya bidhal. Sigeg.

 

4. Adegan magak ing pertapan kendhalisadha : resi mayangkara ingkang semedi,nyuwun pejah awit ngrumaosi sampun jeleh gesang ngantos pinten pinten jaman,katungka praptanipun batara naradha. Sawusnya bage binage,sang kanekaputra ngandika bilih resi mayangkara saged sampurna patinipun menawi saged ngrukunaken trah pandawa,antawisipun yawastina lan kediri. Resi mayangkara sagah gya budhal. Sigeg 

 

Pathet sanga :

 

1. Gara-gara 

 

2. Ing wana minangsraya : putra yawastina cacah tiga nama raden astradarma,raden darmasarana lan raden darmakusuma kahadep punakawan. Rembag : sungkawa awit nagari yawastina kabedah,prabu kijing wahana lan raden aji darma sampun pejah dening prabu jayabaya. Sru ing sedya lumampah laku brata.

 

3. Perang kembang : wadya raseksa wana minangsraya pinanggih satriya kekalih,kinira lamun turun kediri,arsa perang rame,nanging wadya minangsraya pejah. Candhakan : sasampunipun pejah pinanggih kaliyan resi mayangkara,sasampunipun bage binage,resi mayangkara sagah kinarya ngrukunaken trah yawastina lan kediri,bambangan ketiga kalebetaken kancing gelung. 

 

4. Candhakan : resi mayangkara ing margi pinanggih raden jaya amijaya,lan resi mayangkara sagah dados srayan kediri,gya kakanthi tumuju praja.

 

Pathet manyura :

 

1. Jejer negara kediri : prabu jayabaya lan patih sugsara nampi sowanipun raden jaya amijaya ingkang anganti srayan resi mayangkara,dupi uninga punika kadang tunggal bayu kaliyan ingkang eyang raden werkudara,prabu jayabaya ngabekti lan pasrah sedaya dhateng resi mayangkara. Resi mayangkara sagah gya mapag mengsah. Candhakan : resi mayangkara kepapag patih kridagsa lan patih hudragsa,dadi perang rame. Patih kekalih wekasan pejah didu sirahipun,wadya sela uma wangsul praja wadul mring prabu yaksadewa. Sigeg. 

 

2. Ing kedhaton kediri : prabu jayabaya,dewi sesanti,dewi pramesti lan dewi pramuni nampi sowanipun resi mayangkara. Matur menawi sampun nyirnakaken mengsah,prabu jayabaya bungah lan kaganjar putri tetiga. Candhakan : putri tetiga nangis dene angsal pandhita wanara ingkang sampun sepuh,lan nyuwun pejah dhateng ingkang rama. Resi mayangkara rumaos dipun semoni lajeng ngedalaken raden astradarma,raden darmasarana lan raden darmakusuma saking kancing gelung,resi mayangkara ngandika menawi punika minangka garwa putri tetiga,lan resi mayangkara ngandika bilih punika putra swargi prabu kijing wahana ing yawastina,kinarya sarana ngrukunaken trah yawastina lan kediri. Prabu jayabaya lilih penggalihipun lan bungahing manah dene wonten margi rukuning trah pandawa. Candhakan : patih sugsara sowan lan wadul bilih prabu yaksadewa ngamuk,resi mayangkara maju. 

 

3. Candhakan brubuh : prabu yaksadewa kepapag resi mayangkara,dadi perang rame,prabu yaksadewa kawon. Gya mlajar nanging kepapag batara kala,nampi dhawuh saking batara guru kinen mapag patinipun resi mayangkara. Batara kala malih dadi gada inten,prabu yaksadewa maju perang malih. Candhakan : prabu yaksadewa ngepruk resi mayangkara mawi gada inten malihanipun batara kala,kraos sumrepet panonipun resi mayangkara,nanging gya ngedalaken kasekten pungkasan,nyandak jangganipun prabu yaksadewa. Prabu yaksadewa lan resi mayangkara pejah sampyuh,gada inten malih batara kala gya wangsul kahyangan,resi mayangkara muksa sak raganipun. Wadya sela uma ngamuk kepapag wadya kediri,wadya sela uma kaseblak barat dening raden sambawa,raden sambawa tayungan.

 

4. Jejer pungkasan : prabu jayabaya,dewi sesanti,dewi pramesti,dewi pramuni,raden jaya amijaya lan patih sugsara kahadep raden astradarma,raden darmasarana,raden darmakusuma,patih sugsara,lan punakawan. Rembag : wus kelampahan putri tetiga antuk jodho,lan kelampahan rukun antawisipun trah yawastina lan trah kediri,lan ngumbulaken donga dene resi mayangkara sampun muksa kondur kasidan jati. Tancep kayon.