Lampahan Jayabaya krama (Wayang madya)

 (ringgit jayabaya (prabu jayapurusa) koleksi Ki Rudy Wiratama Partohardono)
Pathet nem :

1. jejer negara Kediri : prabu gendrayana kahadep ingkang paman prabu wanasari, raden jayabaya, empu pulwa, lan patih sutikna. Rembug : wanci badhe dumugining wiwaha dhaup raden jayabaya kaliyan Dewi sutiknawati putra patih sutikna, kedadak manten Putri murca saking praja, andadosaken sungkawaning wong sapraja. Dereng dangu kesaru praptanipun pandhita saking gunung wilis peparab resi danisura, nyuwun minta sraya awit gunung wilis nampi pagebluk, ing Tegal pesawahan kaserang hama. Raden jayabaya kapatah kinarya sraya, raden jayabaya budhal sesarengan kaliyan resi danisura. Sang nata ndawuhaken ki patih kinen nguntabaken jengkaripun ingkang putra, patih sutikna sandika. Kondur ngedhaton.

2. paseban njawi : patih sutikna kahadep adipati banjarjunut adipati danureja, raden sugsara, raden wirasena, raden sambawa, tumenggung juragan kurma. Rembag : nguntabaken jengkaripun raden jayabaya ingkang dados srayan pandhita gunung wilis. Budhalan.

3. jejer nagara widharba (hindia) : prabu gajahsinga ya prabu palguna kahadep resi kastra, ingkang rayi raden maudara lan patih barat katiga. Rembag : sak muksanipun ingkang raka resi budha, nagari widharba sak isen isene praja kalebetaken teken wuluh gading kaparingaken prabu gendrayana rikala babad wana mamenang lan dumadine negara Kediri. Ing sedya arsa nggulung praja, dipun emutaken kaliyan resi kastra lan raden maudara nanging datan digugu sang nata malah prabu gajahsinga nundung resi kastra lan raden maudara. Sang nata ndawuhaken patih barat katiga kinen pacak baris nglurug praja Kediri. Budhalan sabrang.

4. perang gagal : wadya widharba kepapag wadya Kediri, sulayaning rembag dados pancakara rame wadya widharba mundur.

5. adegan magak ing gunung kendeng : gandarwa salinga nampi sowanipun gandarwa salimbu lan gandarwi salithi. Rembag : murcanipun ingkang garwa gandarwi salithi nama gandarwa jajatma, cubriya menawi nggadahi sedya ingkang awon. Sedaya sami bidhal ngupadi murcanipun gandarwa jajatma. Sigeg.

Pathet sanga :

 1. jejer pertapan gunung wilis : resi danisura kahadep raden jayabaya lan punakawan. Rembug : sungkawa murcanipun Dewi sutiknawati ingkang badhe kagarwa, resi danisura paring srana nanging ngentosi wanci raden jayabaya mungkasi karya nyirnakaken hama sawah. Raden jayabaya lan punakawan budhal.

 2. adegan alas alasan : nalika mandap saking pertapan, mangertos kluwung sap pitu ingkang mboten sak baene, kajemparing raden jayabaya badhar dados pawongan nama resi kumbayana, pujangganipun prabu parikesit. Kinarya tandha panuwun badhe suwita ing ngarsane raden jayabaya. Gya kakanthi raden jayabaya nyirnakaken sagung hama sawah. Sigeg.

3. perang kembang : raden jayabaya pinanggih hama sawah, nalika kabesmi badhar dados batara kinthaka, batara hirantaka, lan batara kirantaka (anak batara kala dewaning hama). Dewa tetiga dados hama awit paring pemut mring kawula kinarya ruwat sukertaning bumi. Kinarya panuwun dewa tetiga paring aji panglemunan dhateng raden jayabaya. Sigeg. Candhakan : wangsul mring pertapan resi danisura ndawuhaken raden jayabaya bilih Dewi sutiknawati kacidra bangsaning gandarwa, mapan wonten alas roban. Mila kedah dipun upadi. Raden jayabaya bidhal. Sigeg.

 Pathet manyura :

1. ing alas roban : Dewi sutiknawati sungkawa awit kacidra gandarwa jajatma. Dereng dangu raden jayabaya dugi, nanging gandarwa jajatma ugi prapta, dadi perang rame. Raden jayabaya njemparing kyai rante, gandarwa jajatma kalah lan dipun dadosaken bal balan kaliyan gandarwa salinga lan gandarwa salimbu. Wekasan gandarwa jajatma nyuwun pangapunten, lan kapok. Raden jayabaya lan Dewi sutiknawati wangsul praja kediri.

2. ing kepatihan Kediri : patih sutikna, Dewi sutiknawati lan raden sugsara nampi sowanipun prabu gendrayana, prabu wanasari, adipati danureja, raden wirasena lan raden jayabaya. Rembag : raden jayabaya lan Dewi sutiknawati kadhaupaken. Sasampunipun dhaup temanten kekalih kaboyong mring praja Kediri, dipun pahargya ing praja.

3. perang brubuh : prabu gajahsinga ngamuk, nanging pejah dening raden jayabaya. Pungkasan raden maudara lan resi kastra teluk lan nderek raden jayabaya. Wadya widharba ingkang ngamuk dipun gusah barat dening raden sambawa. Raden sambawa tayungan. Tancep kayon