Lampahan Jatikusuma (Wayang menak)

 

 (ringgit purwa raden permadi gagrak surakarta,karya sanggar wayang wawan sondakan pimpinan bapak hernot sarwani,rumiyin raden permadi nate kasrambah dapukan  raden jatikusuma dening dalang almarhum Ki Ganda Darman)

 

pathet nem :

1. jejer nagari smarakandhi : prabu sukhbatul iman kahadep patih jabhud lan arya pamecat nyawa. rembag : bab murcaning ingkang putra pembarep raden jatikusuma,dereng dangu pirembagan kesaru praptanipun putra wuragil arya jubhad syah,rembag : jubhad syah sagah ngupadi murcanipun ingkang raka,gya bidhal. sang nata dhawuh mring patih jabhud kinen nguntabaken jengkaripun jubhad syah,sandika gya bubaran.
2. paseban njawi nagari smarakandhi : patih jabhud lan arya pamecat nyawa gya ngawe wadya bala,nenggih jaya wiratma lan tumenggung jaya rowa,rembag : nguntabaken jengkaripun arya jubhad syah kang arsa ngupadi murcanipun raden jatikusuma,sandika gya budhalan.
3. jejer nagari jong biraji : prabu abdul brenggi nampi praptanipun nata ing jajirat prabu panggulan jagad,rembag : arsa nglamar putra prabu abdul brenggi ingkang nami dewi sasmitarasa,sang nata sagah nampi nanging wonten bebana,sinten kemawon ingkang sagah ngusadani ingkang putra kang lagi nandang roga,prabu panggulan jagad sagah nuli wangsul mring jajirat ngupadi dukun,gya wangsul. sigeg
4. perang gagal : wadya jajirat kepapag wadya smarakandhi,sulayaning rembag dadya pancakara,wadya jajirat kasoran gya nyimpang dalan nekuk penjalin. mundur
5. jejer nagari parang trisig (njero samodra) : prabu katwat kobra (ratu ula) kahadep ingkang putra raden katwat asar. rembag : ingkang putra nyuwun pamit kepengin ngambah alam manungsa ngiras pantes nglampahi tapa ngrame,ingkang rama nglilani,gya raden katwat asar bidhal.

pathet sanga :

1. ing satengahing wana : raden jatikusuma kahadep punakawan catur. rembag : raden jatikusuma arsa lelana brata ngiras pantes ndadar jiwanipun,gya kadherekaken panakawan. bidhal
2. sayembara nagari pandhan surat : ing satengahing margi raden jatikusuma mireng bilih ing nagari pandhan surat wonten sayembara,sinten kemawon ingkang sagah ngawonaken rayi nata raden bondhan surati inggih ing mriku kang saged nampi wujud nagari pandhan surat,raden jatikusuma nglebeti sayembara,gya perang tandhing klawan raden bondhan surati,raden bondhan surati kawon ngedali watu kiantel kadri kabalangaken dhateng raden jatikusuma temah kenging sirahipun,rumaos dipun ina temah raden jatikusuma males gya mbalang watu timpuru temah raden bondhan surati dados reca. temah nata pandhan surat kewirangan lajeng pasrah pejah gesang,raden jatikusuma ngusadani raden bondhan surati wangsul wingi uni,lajeng raden jatikusuma ngandika bilih nagari pandhan surat tetepa dipun panggoni,dene raden jatikusuma arsa nglebeti sayembara jong biraji,gya pamit. sigeg.

pathet manyura :

1. jejer nagari jong biraji : prabu abdul brenggi nampi praptanipun raden jatikusuma,arsa mupu sayembara,gya lumebet ing kedhaton,candhakan : raden jatikusuma wus kelampahan ngusadani dewi sasmitarasa wekasan sang dewi lan raden jatikusuma sami tresnanipun lan prabu abdul brenggi ndhaupaken raden jatikusuma lan dewi sasmitarasa . geger njawi : prabu panggulan jagad ing jajirat datan narimakaken wekasan tandhing klawan raden jatikusuma,nanging raden jatikusuma kawon kalebetaken ing cupu dening prabu panggulan jagad dipun bucal ing segara,para punakawan mlajar.
2. candhakan tengah margi : panakawan kepapag arya jubhad syah,rembag : raden jatikusuma wus kelampahan dhaup klawan dewi sasmitarasa putri nagari jong biraji nanging ratu jajirat prabu panggulan jagad tan narimakaken,wekasan perang rame,raden jatikusuma kawon kalebetaken cupu kabucal segara,arya jubhad syah muring gya bidhal arsa mejahi ratu jajirat. candhakan : arya jubhad syah pinangging ingkang raka raden jatikusuma lan raden katwat asar,rembag : bilih ingkang nylametaken saking segara nenggih putra ratu parang trisig,jubhad syah ngaturaken panuwun lan raden katwat asar dipun aku dados sedulur sinarawadi,raden jatikusuma arsa wangsul ing jong biraji,ing pangangkah nyidra dewi sasmitarasa lan kaboyong ing smarakandhi,gya bidhal.
3. candhakan : prabu abdul brenggi lan prabu panggulan jagad ing jajirat,rembag : prabu panggulan jagad arsa mboyong wangsul dewi sasmitarasa,dereng dangu geger para emban rawuh matur bilih sang dewi kacidra raden jatikusuma arsa kaboyong mring praja smarakandhi,prabu panggulan jagad muring gya mlayu ing smarakandhi. sigeg.
4. jejer nagari smarakandhi : prabu sukhbatul iman nengga wangsul ingkang putra kekalih,praptanya putra kekalih lan dewi sasmitarasa dalah punakawan,sang nata suka manahipun,lan sang nata ngandika bilih gandeng wus kelampahan dhaup ing pengajab benjang raden jatikusuma gumanti nata dene prabu sukhbatul iman kang sagah ngembani. geger njawi : jaya wiratma sowan lan wadul bilih ratu jajirat prabu panggulan jagad ngamuk sarwi nyumbari raden jatikusuma,prabu sukhbatul iman muring gya nandangi piyambak. candhakan perang brubuh : prabu sukhbatul iman mapak mengsah prabu panggulan jagad dadi perang rame,wekasan prabu panggulan jagad pejah,wadya jajirat ngamuk nanging kawon dening prajurit smarakandhi.
5. jejer pungkasan : prabu sukhbatul iman nampi praptanya ratu jong biraji prabu abdul brenggi,rembag : sang nata suka bingah manahipun dene keng putra sampun palakrama lan saged bebesanan klawan prabu abdul brenggi,nata jong biraji ugi mekaten,suka parisuka,lan datan kantun kunjuk puji syukur mring gusti kang akarya jagad.tancep kayon