Lampahan Bancak mbalela/jatipitutur (Wayang Gedhog versi Topeng dalang klaten)

(abdi panji,kyai bancak lan kyai doyok. ugi kawastanan jurudeh-prasanta,dumadi saking sang hyang ismaya binelah,koleksi Ki Rudy WIratama Partohardono)




Pathet Nem :

1. Jejer Jenggala : Prabu Inu Kertapati kahadep Panji Kartala,Panji Sinom Pradapa,Panji Gunungsari lan Tumenggung Pakencanan. Rembag : Sakbibare bedah Nusa Bali,Bancak tan purun sowan ing Jenggala,wanuh merong kampuh jingga,gya ndawuhaken Para Kadang supados ngreripih cara alus. Bidhal,Sang Nata Kondur angedhaton.

2. Budhalan Jenggala

3. Jejer Bandar Singulu : Prabu Klana Surapradata kahadep Patih Klana Suradirada,Ranggathana lan Ranggathani. Rembag : Klana Surapradata gandrung lawan Garwa Jenggala Dewi Tamihoyi,niat ajeng kadusta,bidhalan sabrang.

4. Perang Gagal : Wadya Bandar Singulu kepapag wadya Para Kadang Jenggala,pancakara rame. Wadya Bandar Singulu mundur nyimpang marga.


Pathet Sanga :


1. Gara-gara (Adegan Dukuh Dadap Sekar) : Bancak lan Doyok suka parisuka,sabibaripun suka parisuka Bancak ngudarasa babagan duk rikala Bedah Bali rumiyin,Bancak kadapuk Senopati,menawi kelampahan Bedah Bali bakal kaganjar Dewi Tamihoyi,nanging cuwaning penggalih malah kaboyong Prabu Inu Kertapati. Candhakan : kesaru praptanipun Para Kadang Jenggala. Rembag : ngreripih alus supados Bancak kersa sowan dhateng Jenggala,nanging Bancak tan purun satemah dados pancakara Bancak lumawan Para Kadang Jenggala. Para Kadang Jenggala mundur kejawi Panji Kertala ,gya Panji Kertala lumawan Bancak. Bancak kawon gya lumajar. Doyok kadawuhan Para Kadang Jenggala kinen ngupadi Bancak. Gya Doyok sumusul,Doyok memba kawula Bambang bagus kekasih Pituturjati.

2. Adegan Wana Wewengkon Singasari : Bancak lumajar gya semedi,kerawuhan Bathara Naradha sarwi mbekta cupu isi busana bambangan,gya Bancak kaparingan Busana Bambangan,Bancak Salin dados bambangan bagus warnane kekasih Jatipitutur. Bathara Naradha dhawuh mring Jatipitutur tumuju ing Taman Pranajiwa. Gya bidhal.

3. Adegan Taman Pranajiwa : Dewi Tamihoyi pinanggih lawan Jatipitutur,gya sami gandrungan. Emban kaget gya lapur mring Sang Nata.


Pathet Manyura :


1. Jejer Jenggala : Prabu Inu Kertapati kahadep Panji Kertala,Panji Sinom Pradapa lan Panji Gunungsari,ketekan emban lapur menawi wonten maling ingkang gandrung klawan Dewi Tamihoyi. Gya ndawuhaken dhateng Para Kadang Jenggala kinen ngrangket maling. Bidhal,Candhakan ing Taman Pranajiwa : Jatipitutur gandrung klawan Dewi Tamihoyi kadenangan Para Kadang Jenggala,gya pancakara nanging Para Kadang Jenggala kawon. Gya mundur.

2. Candhakan : Prabu Inu Kertapati nampi palapuranipun Panji Sinom Pradapa menawi Para Kadang Jenggala sami kasoran tandhing lawan maling aguna,gya Prabu Inu Kertapati damel sayembara. Sok sapaa sing bisa nandhingi maling saged nampi ganjaran Dewi Tami Hoyi,kerawuhan Pituturjati sagah majeng nandhingi maling. Gya bidhal. Candhakan : Jatipitutur lan Dewi Tami Hoyi kepapag Pituturjati. Gya pancakara,badhar dados Bancak lan Doyok. Bancak ngandika menawi kados ngaten menika awit mbalela dhateng Prabu Inu Kertapati ingkang tan emut nalika jaman Bedah Bali,Doyok sagah ngemutaken nanging kedah Bancak lan Tami Hoyi purun sowan,gya bidhal sowan.

3. Jejer Jenggala : Prabu Inu Kertapati lan Panji Sinom Pradapa nampi praptanipun Bancak,Doyok,lan Dewi Tami Hoyi. Rembag : Doyok ngemutaken Prabu Inu Kertapati bab nalika Jaman Bedah Bali Bancak dados senopati,menawi saged mbedah Bali kaganjar Dewi Tami Hoyi,nanging tan emut dhateng janjinipun satemah Prabu Inu Kertapati nglenggana ing kalepetan. Lajeng Prabu Inu Kertapati ndaupaken Bancak lan Dewi Tami Hoyi,kesaru praptanipun Panji Gunungsari lapur menawi Ratu Bandar Singulu Prabu Klana Surapradata ngamuk. Gya ndawuhaken Para Kadang Jenggala mungkasi dedamel. Gya bidhalan.

4. Candhakan amuk-amukan : Prabu Klana Surapradata kepapag Panji Kertala,perang lajeng Klana Surapradata kawon,Wadya Bandar Singulu mundur. Tayungan.

5. Jejer Jenggala pungkasan : Prabu Inu Kertapati kahadep Panji Kertala,Panji Sinom Pradapa,Panji Gunungsari,Bancak,Doyok lan Dewi Tami Hoyi. Rembag : sampun purna lelampahanipun Bancak Mbalela,gya sami ngunjukaken Puji Syukur mring Gusti Kang Maha Kuwaos.Tancep Kayon