Lampahan Bambang Gandawardaya (Wayang Purwa)

(bambangan srambahan,karya sanggar wayang wawan sondakan pimpinan bapak hernot sarwani,koleksi bapak sindung cahyadi/bapa bima karangjati)

Pathet nem :

 1. Jejer negara ngastina : prabu duryudana kahadep resi durna, patih sengkuni, adipati karna lan raden kartamarma. Rembag : sang nata mbudidaya sirnaning pandawa kanthi srana ngginakaken Abdi enggal ingkang wonten ing gajahoya nama Bambang gandawardaya, gya katimbalan sowan mring sang nata. Candhakan : Bambang gandawardaya katimbalan sowan, nulya kadhawuhan mbedah ngamarta, nanging kajujug wonten ing kasatriyan jodhipati awit raden werkudara nembe gegladen Yuda. Bambang gandawardaya sandika gya bidhal. Adipati karna kadhawuhan ngawat awati, narpati ngawangga sandika. Kondur ngedhaton.

 2. Paseban njawi : patih sengkuni kahadep kurawa. Dereng dangu praptanipun raden Lesmana mandra kumara, rembag : raden Lesmana mandra kumara gandrung kaliyan garwanipun Bambang gandawardaya sesilih Dewi grantangsasi, patih sengkuni dhawuh para kurawa kinen pacak baris tumuju mring gajahoya kinen nyidra Dewi grantangsasi, nanging ngentosi menawi Bambang gandawardaya sampun bidhal ngraman dhateng jodhipati. Kurawa budal lampah dedemitan.

3. Jejer pindo ing kadipaten gajahoya : Dewi grantangsasi kahadep ingkang rayi Dewi grantangsari, lan rayinipun Bambang gandawardaya kekasih Bambang gandakusuma. Rembag : sang Dewi ngentosi konduripun ingkang garwa Bambang gandawardaya ingkang katimbalan dhateng ngastina. Candhakan : praptanipun Bambang gandawardaya, sawusnya bage binage, Bambang gandawardaya minta pamit arsa ngraman dhateng ngamarta, kalilan budhal.

 4. Candhakan perang gagal : sak pungkuripun Bambang gandawardaya, katungka praptanipun patih sengkuni, raden Lesmana mandra kumara lan kurawa. Sedya arsa mboyong Dewi grantangsasi lan Dewi grantangsari, Bambang gandakusuma muring, dadi perang rame. Nanging Bambang gandakusuma kalah kenging pusaka jemparing kyai barla kagunganipun raden dursasana, satemah Bambang gandakusuma kontal tebih. Dewi kekalih kacidra raden Lesmana mandra kumara. Sigeg

5. Adegan magakan ing negara tasikmadu : prabu arjunayana kahadep ingkang putra Dewi gandawati. Rembag : sang Dewi menggalihaken ingkang putra Bambang gandawardaya lan Bambang gandakusuma, kraos sumelang bab kawilujenganipun putra kekalih. Gya prabu arjunayana anganti Dewi gandawati dhateng nagari ngamarta. Sigeg.

Pathet sanga :

 1. Jejer pertapan saptaharga : begawan abiyasa nampi sowanipun raden arjuna lan punakawan. Rembag : raden arjuna ngimpi ingkang raka raden werkudara mawi busana sarwa jingga anitih baita ingkang katempuhing prahara, sang wiku ngandika bilih mangke negara ngamarta kenging pacoban. Sasampunipun terwaca dhawuh ingkang eyang, raden arjuna pamit wangsul mring ngamarta.

2. Perang kembang : ing margi raden arjuna kepapag wadya raseksa saking ganda mayit. Sulayaning rembag dados pancakara, dadi perang rame. Wadya raseksa sami pejah. Sigeg

3. Adegan sintren ing kasatriyan jodhipati : raden werkudara kahadep ingkang putra raden antareja, raden gathutkaca, raden antasena lan patih gagakbaka. Rembag : raden werkudara arsa gegladen perang, dereng rampung anggenipun rembag kesaru praptanipun Bambang gandawardaya,ngaku srayan kurawa arsa nantang raden werkudara. Putra jodhipati muring gya ngroyok Bambang gandawardaya nanging putra jodhipati kasoran. Raden werkudara maju nanging Bambang gandawardaya mateg pedhut wisa anjalari raden werkudara kantaka, kalebet putra jodhipati sami Tan enget purwa duksina. Patih gagakbaka lumajar dhateng ngamarta. Sigeg.

 Pathet manyura :

 1. Jejer negara ngamarta : prabu puntadewa kahadep prabu kresna lan raden arjuna. Rembag : angentosi sowaning raden werkudara. Candhakan : praptanipun patih gagakbaka wadul bilih raden werkudara lan putra jodhipati sami kantaka dipun kalahaken Bambang gandawardaya srayan kurawa, raden arjuna muring lajeng budhal. Prabu kresna ngawat awati. Sigeg.

 2. Candhakan : raden arjuna kagyat dupi mulat ingkang raka raden werkudara lan putra jodhipati kantaka kenging pedhut wisa, gya sang abagus musthi Sanjata kyai bayuwastra, nyeblak pedhut wisa satemah raden werkudara lan putra jodhipati sami enget malih.

3. Candhakan : raden arjuna perang kaliyan Bambang gandawardaya,dadya rame. Bambang gandawardaya kawon lajeng ngunus pusaka kyai kalanadhah. Raden arjuna Tan pangling bilih punika pusakanipun, lajeng musthi kyai pulanggeni. Perang keris, ngantos Bambang gandawardaya kalah badhe kaperjaya raden arjuna, nanging kapisah dening prabu kresna, anyarengi praptanipun prabu arjunayana lan Dewi gandawati. Lajeng sang Dewi anyariosaken bilih punika putra raden arjuna piyambak patutan lawan Dewi gandawati ing tasikmadu, raden arjuna nangis gya ngrangkul bambang gandawardaya, semanten ugi bambang gandawardaya ngaku bilih ngupaya ingkang raden arjuna nanging kesasar suwita dhateng kurawa. Candhakan : sawusnya sami Senen sinenenan kesaru bambang gandakusuma kontal akuthah ludira, dipun usadani prabu kresna. Wus pulih wingi uni lajeng bambang gandakusuma wadul bilih Dewi grantangsasi lan Dewi grantangsari kacidra dening putra ngastina raden Lesmana mandra kumara. Sedaya sami nglurug dhateng ngastina.

4. Candhakan brubuh : Dewi grantangsasi lan Dewi grantangsari kabujung raden Lesmana mandra kumara lan kurawa. Dereng dangu raden Lesmana mandra kumara dipun hajar dening bambang gandawardaya, Dene kurawa ngamuk dipun hajar raden werkudara. Raden Lesmana mandra kumara lan kurawa mlajar. Raden werkudara tayungan.

5. Jejer pungkasan : prabu puntadewa, prabu kresna, raden werkudara, raden arjuna kahadep prabu arjunayana, Dewi gandawati, Bambang gandawardaya, bambang gandakusuma, Dewi grantangsasi lan Dewi grantangsari, miwah punakawan. Sedaya sami suka syukur Dene sampun makempal, Dene Bambang gandawardaya lan Bambang gandakusuma wus pinanggih ingkang Rama raden arjuna. Tancep kayon.