Lampahan Alap-alap Putri Banyuwangi (wayang madya)

 

 

(prabu aji pamasa ya prabu kusumawicitra ing mamenang,ringgit madya koleksi Ki Rudy Wiratama Partohardono)

 

Pathet nem :

 

1. Jejer negara kediri : prabu aji pamasa kahadep patih tambakbaya,pujangga brahmacari,narpati mandrapura prabu mandrakumara,tumenggung wirapraba lan wirabaya. Rembag : sang nata nampi wangsit kinen krama klawan putri banyuwangi atmajaning resi kapyara ing ing pertapan tirtaganda sesilih endang daruki. Sang nata ndawuhaken sang resi kinen nglamaraken,sang resi sandika nulya kadherekaken prabu mandrakumara lan tumenggung kekalih. Kondur ngedhaton

 

2. Budhalan kediri 

 

3. Jejer pindo ing negara ujung timur : raja ditya prabu giri tungu kahadep resi kala niskala lan patih ditya wrisika. Rembag : sang nata gandrung kaliyan putri banyuwangi,gya sang nata ndawuhaken resi kala niskala lan patih ditya wrisika kinen nglamaraken. Sadaya sandika,budhalan.

 

4. Perang gagal : wadya kediri kepapag wadya ujung timur. Sulayaning rembag dados pancakara,dados perang rame,wadya ujung timur kawon gya nyimpang dalan. Sigeg 

 

Pathet sanga :

 

1. Gara-gara 

 

2. Ing negara bojanegara : raden gandakusuma kahadep ingkang garwa dewi sutiknawati lan punakawan. Rembag : sang bagus sungkawa awit pejahipun ingkang rama prabu anglingkusuma dening prabu aji pamasa,raden gandakusuma narimakaken awit kemutan kamurkaning ingkang rama ingkang damel kapitunan asanes. Sang raden pamit arsa nglamar putri banyuwangi,kalilan budhal.

 

3. Perang kembang : raden gandakusuma ing margi kepapag wadya raseksa ujung timur. Dados perang rame,wadya raseksa sami pejah. Sigeg.

 

4. Adegan sintren (ing pertapan tirtaganda) : resi kapyara lan endang daruki nampi sowanipun pujangga brahmacari,prabu mandrakumara lan tumenggung wirapraba,wirabaya. Rembag : arsa nglamar endang daruki kagem ratu kediri,sang resi ngeparengaken. Candhakan : praptanipun duta ujung timur nenggih resi kala niskala lan patih ditya wrisika,ugi badhe nglamar endang daruki,nanging prabu mandrakumara mangsuli menawi putri banyuwangi sampun kalamar prabu aji pamasa ing kediri,resi kala niskala muring. Dadi perang rame,patih ditya wrisika lan resi kala niskala kasor gya wangsul praja wadul prabu giri tungu,dene tumenggung wirapraba lan tumenggung wirabaya kadhawuhan pujangga brahmacari kinen wangsul mring kedhiri kinen wadul mring sang nata. Sigeg 

 

Pathet manyura :

 

1. Candhakan ing kediri : prabu aji pamasa lan patih tambakbaya nampi sowanipun tumenggung wirapraba lan tumenggung wirabaya. Rembag : putri banyuwangi sampun kalamar nanging badhe karebat utusan ratu ujung timur,prabu aji pamasa muring gya ndawuhaken patih tambakbaya kinen pacak baris nglurug dhateng pertapan tirtaganda. Budhal.

 

2. Candhakan perang : ringkese cariyos prabu giri tungu sampun dumugi wonten pertapan tirtaganda lan prabu aji pamasa ugi mekaten,dados perang rame,nanging dereng wonten ingkang menang lan kalah. 

 

3. Ing pertapan ujung jalamanik : naga daruka (ingkang dumadi saking pusere endang daruki) kang lagya semedi,kesaru rawuhipun batara naradha,gya peparing pusaka nama manik santika,kuwasane nggadahi kasekten nggegirisi. Pusaka dipun untal naga daruka,batara naradha ndawuhaken naga daruka kinen tumuju dhateng pertapan tirtaganda awit ingkang raka endang daruki dadi rebutan. Naga daruka bidhal.

 

4. Candhakan brubuh : ing paprangan ageng,raden gandakusuma sumusul,nanging kepapag naga daruka,ngaku menawi kadangipun endang daruki ingkang nedya sabiyantu nglawan raja ditya,raden gandakusuma nglilani. Candhakan : naga daruka ambles bumi,rikala medal saking bumi dados banjir ageng,nempuh prabu giri tungu sak wadya dadi lan patine. Sigeg 

 

5. Adegan pungkasan : prabu aji pamasa pinanggih raden gandakusuma,rembag : nata kediri takon sinten ingkang sabiyantu,raden gandakusuma mangsuli ingkang sabiyantu naga daruka ingkang dumadi saking puseripun endang daruki garwa nata kediri. Midhanget aturipun raden gandakusuma,prabu aji pamasa ing batin semu wirang awit mengsah kabiyantu sipating kewan. Sang nata kondur tanpa pamit. Tancep kayon